قال لك فيدرالية
الزوجة/ مستقبله
زوجها وقد رسمت ابتسامة كبيرة علي وجهها / خلاص خلاص يا حسونة أنحلن كل مشاكلنا
الزوج/ وقد علت وجهه الدهشة / خير خير أن شاء
الله شن فيه حصلتي ورثة والله القيتي مطلب
الزوجة / لا ألقيت نظام جديد وأفكار متطورة أتحل كل مشاكلنا
الزوج / نظام نظام ومن أمته أنتِ أتحبي النظام
. وبعدين شن هو النظام هلي أيحل كل مشاكلنا هلي ما تكمل بكل وأنتِ أولها
الزوجة / فلدارية يا ابنادم فلدارية
الزوج / وشن هيا ها الفلدارية
الزوجة / تقسيم تقسيم
الزوج / قصدك الفيدرالية
الزوجة / ايوه
الزوج / ونحن شن دخلنا بيها وشن عندنا ما انقسموا
الزوجة / انديروها هن في حوشنا
الزوج / وهو يقهقه هاذي إلي ما زالت والله . وكيف
انديروها
الزوجة / انفصال إداري يا حسونة بدل ما تقعد أنت متحكم فينا
ونظام مركزي أنديرو انفصال إداري
الزوج / وهذي بسم الله الرحمن الرحيم كيف أتجي
الزوجة / بسيطة يا حسونة أنت أول ما تأخذ مرتبك أتقسمه أربع
حصص أنا حصة والبنات حصة والعويل حصة وأنت حصة وكل واحد علي رأسه
أنا حصتي خاصة بالزلوفات والبنات والعويل مصاريفهم الخاصة وأنت أتجيب أمصيرف الحوش
الزوج / بس يعنى
الفيدرالية للمعاش بس
الزوجة / أيه يعنى أتفكنا من حكمك الدكتاتوري المركزي
وأتخلى كل حد أيدير هلي تعجبه
الزوج / يعنى
انقسموا أسرتنا ويش يقولوا علينا الناس عقاب الوقت
الزوجة / موش قسمه
يا بنادم موش قسمة الحوش واحد ونحن ايقولولنا عيت حسن وكتيب العائلة واحد بس الانفصال
داخلي انقسموا حتى الديار
الزوج / وشن فايدتها هذي
الزوجة / يعنى بدل ما
نقعد أنراجي فيك ونحايل عليك بيش أتخليني انعدي مشوار أو زيارة أنعدي امتا ما يصحلي
والبنات كيفي والعويل وأخر الشهر أنتحاسبوا
الزوج / وانأ شن دوري عاد
الزوجة / أنت خليك متريح في إقليم المربوعة وتوفر
لنا الحراسة
الزوج / عوو عو عو كلب حراسة يعنى
الزوجة / حشاك يا حسونه بس تقدر اتقول حاكم شكلي فقط
ديكور خارجي
الزوج / ومنين جبتي هالأفكار الجهنمية
الزوجة / حديث الساعة وبعدين موش فيه وحدين يبوا
يديروها في ليبيا
الزوج / أعوذ بالله ليبيا واحدة موحدة وهلي يبي
أيديرها في ليبيا نسأل الله أن تطبقها أسرته ويتفكك شملها هذول ناس طماعة أمعبيين حقد
الزوج / نحن تمينا كيف القرود أمغير أنقلد في الأجانب
ونسينا ديننا ونظامنا الإسلامي المبنى علي لملمة الشمل
الزوج / صحيح هذه الأنظمة حصيلة وتنفيذ لحكمة اليهود
الملاعين ( فرق تسد )
الزوج / اسمعي يا وليه الله أتعطيك بلية فكينا
من أفكارك السود النود وخلي أسرتنا مترابطة وعدي حطي ألغدا ورد بالك يسمعوا كلامك العويل
خلي الخيوة خيوة
بقلم / سعد الوحيشي
ليست هناك تعليقات:
إرسال تعليق