اعتصـــــــــــــــــــــــــــــــــــــــــــام
* الزوج داخل الي البيت مهرولاً صارخاً
* أسمعي ياوليه تقدريش تقوليلي شن دعوتك اليوم ثالث يوم ونتى مندكا في دار المقعد أنتى وعيالك ماتبيش تطلعي
* الزوجة صارخة اعتصام يا بنادم أعتصام
* الزوج وشن هو الأعتصام هلي خلاك كارسه أنتى وعويلك وقطعتيني بالشر
* الزوجة حيه وحيه الستر انشالله ماتعرفش الأعتصام شنو
* الزوج اوحياتك ما نعرفه ازعمك موضه جديدة طالعه فهذا الزمن ياتي بالعجب
* الزوجة لا أوحياتك ماهي موضة بس تعلمتها من جارتي دارتها الصاحب بيتها أقعدة أمسكره علي روحها في المطبخ خمسة ايام ما خلاتا أيذوق فيها حاجة لعند جابلها صالون وستارة الدار المقعد أجدد
* الزوج وجارتك منين تعلمتها ؟؟
* الزوجة تعلمتها من بنت عمتها وبنت عمتها تعلمتها من جارة خوها
* الزوج وخمس ايام في المطبخ ونتى كنك ماقعدتى في المطبخ كيفها
* الزوجة وشنو عندنا في المطبخ خاطي الفقر اتريد يقطعني الشر تحساب كوجينتنا كيف كوجينة جارتنا هلي أتوكل الشارع كله
* الزوج أحم أحم موش منها راجلها كان أمين لجنة شعبية وطبعاً واكل ناقة الله وسقياها
* الزوج وانتي عاد شن تبي شن ناقصك ؟؟
* الزوجة حيه بلا حيه تى قول شن موش ناقصك فقر فقر أسود هي الثلاجة الخاربه والله الغساله الي نغسل علي أيدي والله التلفزيون هلي يشتغل بالخبط ونا علي العطاب ما ني طالعه نين أتلمهن لي كلهن وتجيبهن
* الزوج ومنين تبيني انجيبهن حتى افلوس ما عاد فيه والمصارف والدولار يبن واحد كيف فان دام والله جاكي شان بيش أيطق فيهن
* الزوجة والله دبر راسك
* الزوج متفقد أولاده هلي بجانب زوجته وقد أفتقد أبنه ذو السبع سنوات قولي يا وليه وين معتز روح من المدرسة والله ما زال
* الزوجة لا والله قاعد في الفصل مع الطلبة ديرين اعتصام
* الزوج اعتصام اعتصام وعليش ديرينا الاعتصام
* الزوجة ما يبوش المدرس يبوأ يغيروه ويبو تلفزيون وقناة سبيس تو في فترة الأستراحة
* الزوج امالا أسمعي يا وليه حتى أنا ما شي للمربوعة داير اعتصام وعلي الطلاق ما ني طالع نين أتجيني بصونية أمقطع بالقديد
بقلم / سعد الوحيشي
ليست هناك تعليقات:
إرسال تعليق